Lambug Beach, Badian, Cebu

Tihik Nga Laagan

Lambug Beach Badian Sherwin Alcover Adventure Sherwin Alcover Loloys Greyt Adbentyurs

           Daghan kaayong mga tawo, hilabi na ang mga Cebuano ang wala pa nakatunob sa maanindot nga dagat sa Badian, ang Lambug Beach. Wala pa kaayo natandog ang kaanyag sa maong dapit tungod kay dili pa kaayo daghan ang tig-duwaan diring dapita ikumpara sa ubang sikat nga mga laaganan. 

           

          Hamugaway og presko gayud ang hangin og dili mo mabati ang kasamok nga matagamtam mo sa ciudad. Limpyo ang baybayon, tin-aw nga dagat og maabi-abihon nga mga lokal ang mo sugat kanimo sa Lambug Beach. Barato usab ang mga palaliton og adunay maayong mga kwarto'ng-akomodasyon ang imong mapilian sa saktong presyo. Daw, diyutay nga Boracay ang Lambug Beach sa maputing balas niini. Dili man susama ka daghang mga hotel-resort ang Lambug, apan aduna kini mga gagmay'ng balay nga pweding temporaryong mapuy-an nga barato og pwedi ra nga mahangyo. 

Unsaon sa Pag-adto?


Gikan sa Cebu City:

                                  Cebu City - Badian (sakay og Bus sa South Bus Terminal padulong sa Badian, sultihi daan ang driver nga i-hunong kamo sa eskina para Lambug. 105 pesos lamang ang pletihan sa aircon-bus. Arun ka maka-daginot, sakay og non-aircon nga Ceres Bus o Sunrays Bus. 

                           Eskina Lambug - Lambug Beach (sakay og motorized tri-cycle, minimum nga pletihan = 20 pesos kada-tawo. Kun mangayo pa og mas dako nga pletihan, ayaw og sugot.) Pero dili sama sa ubang mga lokal ang taga Badian, Mahadlukon pa sila sa pagbuhat og pagpangilad.

               Ig-abot sa Lambug Beach, pwedi na kamong mo-pili kun asa dapit kamo gusto'ng mopahiluna. Pwedi kamong mag-dala og kaugalingon tent og adunay mga luna nga libre lang butangan og tent. Aduna usab mga loka nga mopa-abang og tent sa kantidad nga 400, 500, 600, 700 pesos, depende sa kadak-on.

Pwedi kamong manginhas sa hunasan. Adunay daghang klaseng kinsahon ang anaa sa hunasan asa Lambug. So, makalibre namo'g sud-an. Maayo nalang.

Sama sa Basdaku, Moalboal, makapang-hupaw sad ikaw sa kaanindot nga tan-awon sa pagsawop sa adlaw sa Lambug Beach. 

Credits to Jocel Quiachon, Vecil Bejer, and Nicole Soquibe

Sunda sa Facebook si Loloys Greyt Adbentyurs